Metþátttaka á vel heppnaðri vorráðstefnu

Metþátttaka á vel heppnaðri vorráðstefnu

Hin árlega vorráðstefna Ráðgjafar- og greiningarstöðvar fór fram dagana 8. og 9. maí 2025 á Hilton Reykjavík Nordica og var einnig streymt á netinu. Í ár var hún haldin í samstarfi við Landssamtökin Þroskahjálp undir yfirskriftinni Fötluð börn og fjölbreyttur menningar- og tungumálabakgrunnur – áskoranir og tækifæri. Um 550 þátttakendur sóttu ráðstefnuna, þar af um 100 í gegnum streymi – sem gerir hana að einni stærstu ráðstefnu RGR til þessa.

Ráðstefnan var sú fertugasta í röðinni og þótti einstaklega vel heppnuð, bæði hvað varðar faglegt innihald og skipulag. „Algjörlega frábær ráðstefna og skipulag til fyrirmyndar,“ sagði einn þátttakandi í ráðstefnukönnun. Annar bætti við: „Ótrúlega flott ráðstefna. Takk fyrir mig.“

Barna- og menntamálaráðherra, Guðmundur Ingi Kristinsson, ávarpaði gesti við upphaf ráðstefnunnar. Aðalfyrirlesari ráðstefnunnar var Jarno Lehtonen frá Tukena Foundation í Finnlandi. Hann fjallaði um jöfn réttindi til þjónustu fyrir fjölskyldur fatlaðra barna með erlendan bakgrunn.

Á ráðstefnunni var fjallað um fjölmörg málefni, þar á meðal tvöfalda jaðarsetningu (e. Double Minority Challenge) sem fatlaðir einstaklingar standa frammi fyrir þegar þeir eru innflytjendur eða flóttafólk. Einnig var farið yfir þjónustu, áskoranir og tækifæri í starfsemi Ráðgjafar- og greiningarstöðvar, sem og fjölgun tilvísana barna með erlendan bakgrunn til stofnunarinnar. Reynslusögur foreldra, ungmenna og sveitarfélaga af þjónustu við börn og fjölskyldur af erlendum uppruna voru einnig dregnar fram.

Kynnt voru störf brúarsmiða, MEMM-verkefnið og notkun gervigreindar til að styðja við fjölbreytni og ólíka menningu. Einnig voru kynntar áætlanir um nýjan matsferil til að samræma námsmat í grunnskólum út frá ólíkum hópi barna. Sjónarhorn ÍSAT-kennara og reynsla starfsfólks í þjónustu við fötluð börn af erlendum uppruna voru einnig rædd.

Ráðstefnan fjallaði einnig um stöðu túlkamála á Íslandi, málþroska fatlaðra barna með fjölbreyttan menningar- og tungumálabakgrunn og hagnýt ráð til að styðja við málþroska og tjáskipti þeirra. Klettaskóli kynnti tækifæri í tækninotkun og Æfingastöð deildi reynslu sinni af fjölskyldumiðaðri endurhæfingu. Að auki var fjallað um áfallamiðaða nálgun í vinnu með börnum með hegðunarvanda, sem og menningarfærni og inngildingu í starfi með fjölbreyttum hópi.

Þátttakendur lýstu ánægju með erindin: „Erindi voru vel valin og pössuðu vel saman“ sagði einn og annar bætti við „maður lærir alltaf eitthvað nýtt og gaman að heyra önnur sjónarhorn,“ Enn annar komst svo að orði: „Allt var svo frábært… og viðtölin við foreldra mjög áhrifarík.“

Tónlistarhópurinn Niceguys stigu á stokk á fimmtudeginum og hleyptu lífi í stemmninguna með kraftmiklu atriði sem fékk salinn til að iða.

Niðurstöður úr ráðstefnukönnun sýna að 99% þeirra sem hafa nú þegar svarað myndu líklega sækja ráðstefnu RGR aftur. Um 95% sögðust hafa bætt þekkingu og færni og yfir 94% töldu að þau gætu nýtt það sem þau fræddust um í eigin starfi.

Ráðstefnan undirstrikaði mikilvægi inngildandi samfélags þar sem öll börn fái tækifæri til að þroskast og njóta sín – óháð uppruna, fötlun eða tungumálabakgrunni.

Við þökkum öllum sem komu að undirbúningi og framkvæmd ráðstefnunnar – sérstaklega fyrirlesurum, þátttakendum og fundarstjórum – fyrir þeirra mikilvæga framlag. Sérstakar þakkir fá Niceguys fyrir að hleypa lífi í stemninguna með sinni kraftmiklu sviðsframkomu.