Hærri tíðni tilvísana barna með erlendan bakgrunn á Ráðgjafar- og greiningarstöð samanborið við börn af íslenskum uppruna

Börnum með erlendan bakgrunn er oftar vísað á Ráðgjafar- og greiningarstöð (RGR) en börnum af íslenskum uppruna, samkvæmt nýrri rannsókn sem birt var í vísindaritinu European Child & Adolescent Psychiatry. Rannsóknin ber heitið Rate differences in referrals and diagnostic outcomes of neurodevelopmental disorders between children with native and migrant backgrounds: a retrospective cohort study og var styrkt af Þróunarsjóði innflytjendamála. Höfundar hennar eru Emilía Guðmundsdóttir, Helen M. Frigge, Evald Sæmundsen, Kolbrún B. Jensínudóttir og Urður Njarðvík.

Erlendar rannsóknir hafa sumar hverjar bent til þess að auknar líkur séu á ýmsum taugaþroskaröskunum meðal barna innflytjenda. Mikil fjölgun hefur orðið á tilvísunum barna með erlendan bakgrunn á RGR.

Tilgangur rannsóknarinnar var að kanna hvort munur væri á tíðni tilvísana til RGR hjá börnum með erlendan (a.m.k. annað foreldrið fætt erlendis) og íslenskan (báðir foreldrar fæddir á Íslandi) bakgrunn og hvort munur væri á tíðni valdra greininga (einhverfa, þroskahömlun, CP hreyfihömlun og tal-/málþroskaröskun) sem þau fengu í kjölfarið.

Gagnaöflun náði til nýrra tilvísana á RGR á árunum 2014–2018 (1.367 börn). Eftirfylgdartíminn var 2-7 ár. Tíðni var áætluð út frá hlutföllum af mannfjölda skv. Hagstofu Íslands fyrir hvern hóp.

Helstu niðurstöður:

• Börnum með erlendan bakgrunn var vísað í hærra hlutfalli miðað við börn íslenskra foreldra öll tilvísunarárin fimm. Þetta átti einkum við um börn voru innflytjendur af annarri kynslóð, drengir og undir grunnskólaaldri.
• Þrátt fyrir aukna tíðni tilvísana sást ekki samsvarandi hækkuð tíðni greininga, að undanskildum tal- og málþroskaröskunum, sem voru tíðari hjá börnum með erlendan bakgrunn. Þetta kallar á frekari rannsóknir á hugsanlegum áhrifaþáttum, svo sem málfærni og íslenskukunnáttu.

Greinina má nálgast hér

Málefni barna af fjölbreyttum menningar- og tungumálabakgrunni hafa verið á dagskrá fagfólks og stjórnvalda síðustu ár, meðal annars á Vorráðstefnu RGR og Þroskahjálpar í maí sl., þar sem áhersla var lögð á að stuðla að vitundarvakningu um áskoranir og tækifæri í þjónustu við fötluð börn með fjölbreyttan menningar- og tungumálabakgrunn.