Ráðgjafar- og greiningarstöð glitraði með einstökum börnum ✨

Föstudaginn 27. febrúar tók starfsfólk Ráðgjafar- og greiningarstöðvar þátt í vitundarvakningu í tilefni af Degi sjaldgæfra sjúkdóma og heilkenna. Að frumkvæði Félags Einstakra barna voru landsmenn hvattir til að glitra í samstöðu með börnum og ungmennum sem lifa með sjaldgæfa sjúkdóma og heilkenni. 

Starfsfólk mætti í glimmeri, pallíettum og litríkum klæðnaði sem minnir okkur á að við erum öll ólík og það er styrkur. Með því að taka þátt í þessari skemmtilegu og sýnilegu vitundarvakningu viljum við sýna stuðning og samstöðu með þeim einstaklingum og fjölskyldum sem lifa með sjaldgæfa sjúkdóma og heilkenni. 

Talið er að hátt í 900 börn og ungmenni á Íslandi glími við slíkar greiningar. Þekking á aðstæðum þeirra er oft takmörkuð og mikilvægt er að auka skilning, fræðslu og samstöðu í samfélaginu.

Við á Ráðgjafar- og greiningarstöð leggjum ríka áherslu á að styðja við börn með fjölbreyttan taugaþroska og aðrar flóknar greiningar og fjölskyldur þeirra. Með þátttöku okkar viljum við minna á mikilvægi samstöðu, skilnings á ólíkum þörfum og þess að skapa samfélag þar sem öll börn fá tækifæri til þátttöku og að njóta sín.

💚🩵🩷💜
Við glitruðum – fyrir einstök börn.